Re: Diskussionsforum über den Club
Meine seelische Sauna - der 1. FCN
Sie, seit a boor Dooch gäihds mer eddzer
fei widder besser. Es Schlimmsde, glaabi, hobbi ieberschdandn. Iich hobb ja scho
gor nemmer glabbd, dass des numol wos werrn kennd mid unsern Gnalldebberla,
unsern Bläiderla, unsern aanzichn Fümbfer-Lubbing aff der Welt midder Lizenz zum
Treten: Mid mein Glubb! Ja, dou hobbi doch nu vuurichs Johr dengd, des konn doch
nimmer mei Glubb sei! Däi worn doch damols vo alle schlechdn Geister verlassn!
Dou hossd ja nimmer hieschauer kenner! Dou is monadelang, ja über ein Johr lang,
is dou ka Trainer mehr nausgfluung! Oft hamm däi Gischbl sugor Schbiele gwunner!
Des mousder amol bildlich vuurschdelln: Schbiele gwunner! Deilweise
Heimschbiele! Dore gschossn! Also direggd neidroffn in des glanne Kästla am End
vom Schbillfeld! Odder sie hamm ann Balln aff 20 cm Entfernung vollkommen
fehlerfrei zouschbilln kenner. Draumbässla braggdisch. Und nou sin däi Daidscher Bogalmassder worn! Ja, dou bisd Du doch fast verzweifld! Des is doch nimmer mei
Glubb gwen, mei jahrzehndelanger bersönlicher, einichermaßn wandlnder
Nerfnzusammenbruch! Mei seelische Sauna, woosd Du nach fümbf Minuddn zouschauer
im Stadion bereits vuur lauder Woud kochd hossd! Iich hobbmers in derer Zeid oft
dengd: Ja, dou konni mer doch glei die Bayern ooschauer. Odder Färdd. Und wenni,
wäi fräihers, am Samsdooch nammidooch annerhalb Schdund elf ziddriche Rendner
bam Spaziern-gäih zouschauer hobb wolln, nou hädd ich in Stadtpark gäih mäin. Im
Närmbercher Stadion: Fehlanzeige! Dou hossd Du deilweise richdiche
Fußballschbiele gsehng.
Obber eddzer, eddzer is mei
glanne Welt widder in Orddnung. Eddzer kenni mi widder aus. Eddzer isser widder
in Bedrieb, der aanziche daitsche Drainer-Fluuchhafen. Eddzer kummers alle
värzzäh Dooch widder reigfluung, die Drainer. Und vuur alln: Nausgfluung! Eddzer
werdd widder abgschdieng 1. Liga, 2. Liga, nächsds Johr dann 3. Liga. Eddzer werdd Dir
als Zouschauer endlich widder woss gebodn im Stadion fir Dei Geld! Anner, der
schid der vuur lauder Brass ieber den Schdobbfer am Schbillfeld sei Seidla Bier
vo hindn ins Hemmerd nei, Rest-Sardienerweggla fläing aff die Darddanbahn,
endlich is widder die gude alde Zeid ausbrochn, wo mer sein Nachbern aff der
Gegengeradn die früher su beliebde Breisfrooch schdelln konn: Wos is der
Underschied zwischen en Glubb und an Junikäfer? Antwordd: Der Junikäfer hodd
mehr Bungde. Erschdder Preis: A Freikarddn firs Lokalderby geechern SV
Glaishammer plus schwarzz oogmolder Brilln, dassd bam Zouschauer garandierd nix
sixd. Und mer wass eddzer endlich widder, warum dass die Schbiller bam Eilaafn
immer vo glanne Boum an die Händ gführd wern: Walls vom Warmlaafn scho
schwindlerd sin und allaans es Schbillfeld nimmer findn. Und auch in der
Vorstandschaft wassmer widder, bei wos fir an Verein dassmer is. Nämlich bei
der SpVgg Zabo Zwietracht. Wall wenn die Fäns in der Norddkurvn erschdd mid
kollekdiefn Selbstmord droher und dann ummernanderbrilln: Mir wolln Euch kämpfen sehng!
Mir wolln Euch kämpfen sehng!, nou gäihd ihr sehnlichsder Wunsch sofordd in
Erfüllung, und mer sichds wärgli kämpfen: Der Bräsidend kämpft geechern Manager,
der Vizebräsidend geechern Aufsichtsrad, der Aufsichtsrad geechern Drainer falls
er wass, wer momendan grod Drainer is. Nou, nou hammer 24 Schdund
Wafflschdillschdand. Obber nocherdla gäihds Gott sei Dank widder vo vornna
oo.
Und endlich wissmers widder zu
schätzn, dass es Närmbercher Stadion in weiser Voraussicht nichd vollständich
damols ieberdachd hamm, su wäi in Schalke. Wall sunst kenndn die
Reddungshubschrauber ja nimmer ihre Heuballn abwerfn fir uns Rimbfiecher, däi wo nu zum Glubb
nausgänger.