Re: Gegensprechanlage und GPS auf meiner R 1200 RT
ich wott oi d'navis uf kein fall schlächt mache. aber zume töffuusflug ghört für mich dezue, dassi min wäg uf de charte usesueche und underwägs nach gedächtnis fahre und ab und zue mal wieder uf d'charte luege. wämer sich doch mal verfahrt findtmer no en huffe anderi schöni schtreckene. schliesslich isch uf em töff de wäg s'ziil. abgsee devo treits no dezue bii, dassmer d'geografie automatisch leert. chamer nid vorschtelle, dassmer no gross weiss womer dure gfaare isch wämer macht was s'pfiili und di netti fraueschtimm säged... oder chan eine vo oi nach gps e tour fahre und findt de wäg e wuche schpöter no ohni gps? ich wo nach charte fahre ha kei problem demit...
es navi macht für mich sinn wännmer i chürzischter ziit anen beschtimmte ort ane mues. sottig ferie machi aber ehner mit em auto und dänn ischs ja au kei sach de frau d'charte i d'hand z'drucke und nach ihrer giige z'fahre. mer mues ja au dänn nid all 10 sekunde uf d'charte luege (mer händs uf all fäll bis an atlantik gschafft obwohlsi am afang behauptet hät sie chönn kei charte läse). wo es navi au sinnvoll isch, isch zum bischpiil bi handwerker oder andere dienschtleischter wo müend i fremde schtedt umechrose und öpis finde. da isches natürli top!